विराटनगर माघे संक्रान्ती फुटबलको सेमिफाइनलमा

काठमाडौं (हाम्रो खेलकुद)– विराटनगर फुटबल क्लब नक्सलबारीमा जारी माघे संक्रान्ती खुला नकआउट फुटबल प्रतियोगिताको सेमिफाइनलमा पुगेको छ ।

एपिएफ सुनसरीलाई सोमबार सडन डेथमा हराउँदै विराटनगर अन्तिम चारमा पुगेको हो । निर्धारित समय २–२ को बराबरी टुंगिएपछि खेल टाइब्रेकरमा पुगेको थियो । टाइब्रेकरमा पनि बराबरीपछि सडन डेथमा खेलको निर्णय भएको थियो ।
टाइब्रेकरमा विराटनगरमा अनिल धामी, साइमन्ड लिम्बु, पदम भट्टराई, मनोज राई, अशोक खवास, शिशिर लेखी र वीरेन्द्र लिम्बुले गोल गरे । मिलन राईले भने पेनाल्टीमा गोल गर्न सकेनन् । एपिएफ सुनसरीका बुद्धिमान राई, उज्जवल चाम्लिड्ग, सविन थापा, नवीन चौधरी, रञ्जन मगर र बलराम निरौलाले गोल गरे । हरि कार्की , फुसन मुरमुरले भने पेनाल्टी गोल गर्नबाट चुके ।

त्यसअघि मिलन राईले विराटनगरका लागि २ गोल गरे । एपिएफका लागि वीरेन्द्र लिम्बु र रञ्जन मगरले गोल गरे । मिलनले नवौं मिनेटमा पेनाल्टीमा गोल गर्दै विराटनगरलाई अघि बढाए । वीरेन्द्रले ४१ औं मिनेटमा बराबरी गोल फर्काए ।

६५ औं मिनेटमा मिलनको गोलबाट विराटनगरले पुनः अग्रता लिएको थियो । एपिएफका रञ्जनले ७१ औं मिनेटमा गोल फर्काएपछि खेल बराबरीमा पुगेको थियो । म्यान अफ दि म्याच घोषित विराटनगरका अशोक खवासले मेडलसहित २ हजार रुपैयाँ प्राप्त गरे । प्रतियोगितामा मंगलबार लेटाङ फुटबल क्लब र शतिसाले युनियन केराबारीबीच पहिलो सेमिफाइनल हुनेछ ।

Source link

Share:

Leave a Reply

Your email address will not be published. Required fields are marked *