बेलले आज दोस्रो डेब्यु गर्ने सम्भावना

एजेन्सी – स्पेनिस च्याम्पियन रियल म्याड्रिडबाट लोनमा इंग्लिस क्लब टोटेनहम हट्स्पर फर्केका विंगर ग्यारेथ बेलले आज दोस्रो डेब्यु गर्ने सम्भावना रहेको छ ।

रियलमा ७ वर्ष बसाईंपछि बेल सिजनको सुरुवातमा नै टोटेनहम फर्केका हुन् । चोटका कारण पछिल्ला खेलमा अनुपस्थित रहेका उनले आज प्रिमियर लिगमा टोटेनहमका लागि दोस्रोपटक डेब्यु गर्ने बलियो सम्भावना रहेको छ । टोटेनहमले आज अर्को लन्डन क्लब वेस्ट ह्याम युनाइटेडसँग खेल्दैछ । खेल नेपाली समयानुसार राती ९:१५ बजे सुरु हुनेछ ।
प्रशिक्षक जोसे मोउरिन्होले खेलअघि भएको पत्रकार सम्मेलनमा बेलले खेल्ने बलियो सम्भावना रहेको बताएका हुन् । ‘ पक्कैपनि उनी आफू खेल्न चाहन्छन् । उनी त यहाँ आएको दिनदेखि नै खेल्न आतुर छन् । तर चोटका कारण त्यो सम्भव थिएन । म अहिले नै बेल खेल्छन् वा खेल्दैनन् खुलासा गर्न चाहन्न, तर उनी उत्कृष्ट ढंगले प्रशिक्षण गरिरहेका छन्,’ मोउरिन्होले भने ।
‘सबै खेलाडी महत्त्वपूर्ण हुन्छन् । तर बेलको इतिहासका कारण पनि उनी विशेष खेलाडी हुन् । उनले जति क्लबका बारेमा सोच्छन्, क्लबले पनि उनको बारेमा सोचेको छ,’ मोउरिन्होले भने, ‘ बेलले लामो समय नखेलेका कारण मैदान फर्कने समय लागेको हो । रियलमा खासै प्रशिक्षण नगरेका उनले वेल्सबाट खेल्दा चोट बोक्नुपर्यो । अहिले भने उनी राम्रो स्थितिमा छन् ।’
टोटेनहमले लिगको पछिल्लो खेलमा म्यानचेस्टर युनाइटेडलाई ६-१ ले पराजित गरेको थियो । ह्यारी केन र ह्युङ मिन सनको जोडी जम्दा टोटेनहमले मोउरिन्होको प्रशिक्षणमा राम्रो सुरुवात गरेको छ । टोलीले युरोपा लिग छनोट र लिग कपमा पनि अपराजित नतिजा निकालेको छ ।

Source link

Share:

Leave a Reply

Your email address will not be published. Required fields are marked *