गेटाफेसँग बार्सिलोनाको हार

एजेन्सी – नयाँ प्रशिक्षक रोनाल्ड कोम्यानको प्रशिक्षणमा क्याटलान क्लब बार्सिलोनाले पहिलो हार बेहोरेको छ । स्पेनिस ला लिगामा बार्सिलोना गेटाफेसँग १–० ले पराजित भएको हो ।

रोनाल्डको प्रशिक्षणमा बार्सिलोना सातौ खेलमा पराजित भएको हो । कोलिसिअम अलफोन्सो पेरेज स्टेडियममा बार्सिलोनालाई पराजित गर्न घरेलु टोली गेटाफेका जेइमी माटाले दोस्रो हाफमा पेनाल्टीमार्फत गरेको गोल नै निर्णायक बन्यो ।
बल पोजेसनमा बलियो पकड बनाएपनि बार्सिलोनाले गेटाफेको रक्षापङ्ति तोड्न सकेन । १८औं मिनेटमा काउन्टर एट्याकमा मोउरो एरामबारीको पासमा नेमान्जा माक्सिमोभिकको प्रहारलाई बार्सिलोनाका गोलरक्षक नेटोले बिफल पारे ।

२०औं मिनेटमा पेड्रीको पासमा कप्तान लियोनेल मेस्सीको प्रहार पोस्टबाट थोरै बाहिरिदा बार्सिलोना अग्रता लिनबाट चुक्यो । ३०औं मिनेटमा फ्रान्की डि जोङको पासमा एन्टोइन ग्रिजमन चुके । ५६औं मिनेटमा घरेलु टोलीले पेनाल्टीको अवसर पायो ।
डि जोङले पेनाल्टी बक्समा एलान न्योममाथि फल गरेपछि रेफ्रीले गेटाफेलाई पेनाल्टीको अवसर प्रदान गरेको थियो । जसमा जेइमी माटाले गोल गर्दै गेटाफेलाई १–० को अग्रता दिलाए ।
७९औं मिनेटमा डि जोङकै पासमा अन्सु फातीले वान भर्सेस वानको अवस्थामा गोल गर्न चुक्दा बार्सिलोना बराबरीबाट समेत चुक्यो । ८३औं मिनेटमा माटाको पासमा जुवान हर्नान्डेजको प्रहारलाई नेटोले पञ्च गर्दै बचाए ।

बार्सिलोनाले दोस्रो हाफमा अन्सु फाती, फिलिपे कौटिन्हो, रिकी पुच, ट्रिन्काओ र मार्टिन ब्रेथवेटलाई मैदानमा पठाएपनि हार टार्न सकेन ।
जितपछि गेटाफे ५ खेलबाट १० अंक जोडेर दोस्रो स्थानमा उक्लिएको छ । शीर्षस्थानको रियल म्याड्रिडसँग अंक बराबरी भएपनि गेटाफे गोल अन्तरमा दोस्रो स्थानमा छ । पराजित बार्सिलोना ४ खेलबाट ७ अंक जोडेर नवौं स्थानमा रहेको छ ।

Source link

Share:

Leave a Reply

Your email address will not be published. Required fields are marked *