प्रहरीद्वारा रितेशमाथिको निलम्बन फुकुवा

काठमाडौं (हाम्रो खेलकुद)– पाँच वर्षपछि राष्ट्रिय फुटबल टोलीका पूर्व गोलकिपर रितेश थापामाथि नेपाल प्रहरीले लगाएको निलम्बन फुकुवा भएको छ ।

असार २ गते सर्वोच्च अदालतबाट राज्यविरुद्धको अपराध मुद्दामा सर्वोच्चबाट सफाई पाएको झन्डै साढे ३ महिनापछि प्रहरीले उनीमाथिको निलम्बन फुकुवा गरेको हो । २०७२ को असोजमा उनलाई निलम्बन गरेको थियो ।
रितेशसहित राष्ट्रिय फुटबल टोलीका पूर्व कप्तान सागर थापा, अन्जन केसी, सन्दीप राई, रितेश थापा, विकाससिंह क्षेत्री र फिजियोथेरापिष्ट डेजिव थापाले सर्वोच्चबाट मंगलबार सफाई दिएको थियो । असोज १९ गते निलम्बन फुकुवाको पत्र प्राप्त गरेको थिए । लामो लडाईपछि विशेष र सर्वोच्चबाट न्याय पाएका थियौं, रितेशले भने, त्यसपछि आफ्नो संगठनबाट निलम्बन फुकुवा गर्छ भन्नेमा ढुक्क थिए । फेरि फर्कन पाउँदा खुसी लागेको छ ।
रितेशका अनुसार अहिले उनको दरबन्दी विराटनगर उच्च अदालतमा रहेको छ । केहि दिनपछि हाजिर गर्ने तयारीमा रहेको रितेशले बताए । २०६० सालमा प्रहरीमा आबद्ध भएका रितेशले पुलिसलाई तीन पटक सहिद स्मारक ए डिभिजन लिग जिताएका थिए । २०५७ सालबाट रुस्लान थ्री स्टार क्लबबाट व्यसायिक खेल जीवन सुरु गरेका उनी त्यसपछि पुलिसमा आबद्ध भएका थिए । २०६६ मा उनी प्रहरी सहायक निरिक्षकमा बढुवा भएका थिए । उनले पुलिसबाट पाँच पटक एएफसी प्रेसिडेन्ट्स कप खेलेका थिए । सन् २००७ मा पुलिस प्रेसिडेन्ट्स कपको फाइनल पुगेको थियो ।
फुटबल खेलाडीका रुपमा पुलिसमा प्रवेश भएको उल्लेख गर्दै रितेशले प्रहरी एकेडेमीमा जिम्मेवारीका लागि आग्रह गर्ने बताएका छन् । ‘म खेलकुदबाट आएको हुँ । त्यसैले केहि न केहि योगदान गर्न सक्छु भन्ने लागेको छ’, ३८ वर्षे रितेशले भने, ‘फुटबलमा तत्काल फर्कन पाइन्न। तर पनि खेलकुद विभागमै रहेर कुनै जिम्मेवारीको निर्वाह गर्ने इच्छा छ ।’
राष्ट्रिय टोलीबाट खेल्दा अन्तर्राष्ट्रिय खेलमा रितेशसहितका खेलाडीले म्याच फिक्सिङ गरेको पुलिसको दावी थियो । तर नेपालमा म्याच फिक्सिङको अलग्गै कानुन नभएका कारण पुलिसले राज्यविरुद्धको अपराधमा पाँच जनाविरुद्ध जन्मकैदको माग गर्दै विशेष अदालतमा २०७२ कात्तिक २२ गते मुद्दा दायर गरेको थियो । सुरुमा विशेष अदालत र पछि सर्वोच्चबाट सफाई पाएपछि रितेशको निलम्बन फुकुवा प्रक्रिया सुरु भएको थियो । रितेशसहित सबैलाई एसियाली फुटबलको सर्वोच्च निकाय एएफसीले लगाएको आजीवन प्रतिबन्ध भने यथावत छ ।

Source link

Share:

Leave a Reply

Your email address will not be published. Required fields are marked *