रियलद्वारा खेलाडी विक्रीमा सय मिलियन आम्दानी

एजेन्सी – स्पेनिस क्लब रियल म्याड्रिड ट्रान्सफर बजारमा सामान्यतया ठूलो अनुबन्धन गर्नका लागि प्रख्यात छ । यस सिजन भने टोलीले खेलाडी भित्र्याउने भन्दापनि खेलाडी विक्रिमा बढी सक्रियता देखाएको छ ।

कोरोना भाइरस संक्रमणका कारण क्लबको आर्थिक अवस्था केहि कमजोर भएपछि अध्यक्ष फ्लोरेन्टिनो पेरेजले यसपटक टोलीको योजनामा नरहेका खेलाडीलाई अन्यत्र बेच्ने रणनीति बुनेका छन् । त्यसै अनुरुप यसअघि लोनमा पठाउने गरेका खेलाडीलाई रियलले स्थायी रुपमा नै बेच्दै आफ्नो आर्थिक अवस्था केहि बलियो बनाउन लागिपरेको छ । युवा खेलाडी नै भएपनि रियलले लोनभन्दा स्थायी सम्झौताकै बाटो रोजेको छ ।
सिजनको सुरुवातमा नै युवा डिफेन्डर अक्रफ हाकिमीलाई रियलले इन्टर मिलान पठाएको थियो । इन्टरले ४० मिलियन युरो तिरेर उनलाई अनुबन्ध गर्न सफल रहयो । यसबाहेक जाभी सान्चेज, ड्यानी गोमेज र डे फ्रुटोसको विक्रीबाट पनि रियलले एकमुष्ठ ८.५ मिलियन युरो आर्जन गर्यो ।
लामो समयदेखि क्लब छाड्न चाहिरहेका मिडफिल्डर हामेस रोड्रीग्वेजलै एभर्टनले अनुबन्ध गर्यो । कार्लो एन्चेलोटिले हामेस अनुबन्ध गर्न २५ मिलियन युरो खर्चदा रियललाई निकै राहत मिलेको थियो । अझ ताकेफुसा कुबोलाई लोनमा एक सिजनका लागि भिल्लारियल पठाउँदा समेत रियलले २.५ मिलियन कमाउन सफल रहयो ।

सेभिल्लाले १३.५ मिलियनमा ओस्कार रोड्रीग्वेजलाई खरिद गरेको छ । यसबाहेक रायो भालेकानोले फ्रान गार्सिया, ग्रानडाले जेसस भालेहो र एसी मिलानले ब्राहिम डियाजलाई लोनमा लिएका छन् । ब्राजिलियन मिडफिल्डर रेनिएर पनि लोनमा जर्मन क्लब बोरुसिया डर्टमुन्ड पुगेका छन् । यी सबैको तलबबारे रियलले सोच्नुपर्ने छैन ।
रियलले अब सर्जियो रेगुइलोनलाई ३० मिलियन युरोमा टोटेनहम हट्स्पर पठाउँदै छ । तीनै पक्षबीच सहमति भइसकेको र केहि दिनमा नै औपचारिक घोषणा हुँदैछ । यसबाहेक टोटेनहमले नै आफ्नो पुराना खेलाडी ग्यारेथ बेललाई फिर्ता लग्ने देखिएको छ । दुई क्लबबिच हाल तलबको विषय सुल्झाउन छलफल भइरहेको छ । तर पूरा तलब लिएर पनि रियलको टोलीमा नरहने देखिएपछि बेलको बहिर्गमनले रियललाई पक्कै राहत हुनेछ ।

रियलले यस सिजन खेलाडी बेचेर मात्र १ सय १९ मिलियन युरो कमाउने देखिएको छ । अझ त्यसमा बेचिएका यी खेलाडीको तलबको हिसाब जोडिएको छैन । खेलाडी खरिदमा शान्त बस्दै आफ्ना युवा मिडफिल्डर मार्टिन ओडेगार्डलाई लोनबाट फिर्ता बोलाएको रियलले अर्को सिजनका लागि बचत गरेको बुझिएको छ । किलियन एमबाप्पेलाई मुख्य लक्ष्य बनाएको रियलले सन् २०२१ मा उनलाई अनुबन्ध गर्न तयारी गरिरहेको छ ।

Source link

Share:

Leave a Reply

Your email address will not be published. Required fields are marked *