रियलको सिनियर टोलीसम्म ओडेगार्डको यात्रा

एजेन्सी – नयाँ सिजनका लागि रियल म्याड्रिडको टोलीमा समेटिएका युवा मिडफिल्डर मार्टिन ओडेगार्डले घुँडामा सामान्य समस्याका बाबजुद पनि टोलीको प्रशिक्षणमा प्रभाव जमाउन थालेका छन् ।

गत सिजन लोनमा ला लिगाकै रियल सोसीडाडबाट खेलेका ओडेगार्डले उत्कृष्ट प्रदर्शन गरेका थिए । उनको प्रदर्शनबाट निकै प्रभावित भएपछि प्रशिक्षक जिदानले सोसीडाडमा दुई वर्षको लोन सम्झौता भएपनि उनलाई एक वर्षमै रियल फर्काएका हुन् । ओडेगार्डले सोसीडाडमा अर्को सिजन पनि त्यसै लयमा खेले रियलमा अवसर पाउने अपेक्षा गरेका थिए, तर एक सिजन अघि नै जिदानले उनलाई बोलाए ।
प्रशिक्षणमा गरेको प्रदर्शनलाई आधार मान्ने हो भने ओडेगार्ड रियलको टोलीमा पर्ने पक्का छ । तर घुँडामा सामान्य चोट बोकेका कारण उनले पहिलो खेल गुमाउने सम्भावना रहेको छ । संयोगवश रियलले सिजनको पहिलो खेलमा रियल सोसीडाडकै मैदानमा खेल्दैछ । ओडेगार्डले घुँडाकै समस्याले गर्दा अघिल्लो साता भएको नेसन्स लिगको खेलमा नर्वेबाट बिदा लिएका थिए । प्रतिस्पार्धात्मक खेलबाट बाहिर रहेपनि उनले यो समय रियलमा प्रशिक्षण गरेर सदुपयोग गरे ।
जिदान र ओडेगार्डबीच व्यक्तिगत रुपमा पनि राम्रो सम्बन्ध रहेको छ । जिदान र ओडेगार्डले रियलको दोस्रो टोली, कास्तिलामा संगै काम गरेका थिए । ओडेगार्डलाई त्यसबेला भन्दा अहिले आफ्नो स्तर बढाएका छन् । अहिले उनको विभिन्न पोजिसनमा खेल्न सक्ने क्षमताले रियललाई थप फाइदा पुग्नेछ ।

सन् २०१५ मा रियलले ओडेगार्डलाई अनुबन्ध गर्न बायर्न म्युनिख, म्यानचेस्टर युनाइटेड लगायत युरोपका शीर्ष टोलीलाई पछि पारेको थियो । रियलले युवा अवस्थामा खेलाडी अनुबन्ध गरेर भविष्यमा स्टार खेलाडीका रुपमा स्थापित गर्ने नयाँ कदम चलेको थियो ।
पाँच वर्षको अवधिमा ओडेगार्डले आफूलाई स्टारको रुपमा स्थापित गरेका छन् । अब रियलमा उनले आफूलाई ढाल्नुपर्ने छ । ओडेगार्डले राष्ट्रिय टोलीमा पनि प्रमुख खेलाडीका रुपमा आफ्नो परिचय बसाएका छन् । प्राविधिक रुपमा निपुण ओडेगार्ड युवा त छन् नै, उनको क्षमता र आत्मविश्वासले आउने दिनमा उनलाई विश्वस्तरीय खेलाडीको रुपमा स्थापित गर्ने संकेत गरेको छ ।
रियल म्याड्रिडबाट २०१४-१५ सिजनमा ओडेगार्डले डेब्यु गरेका थिए । रियलले गेटाफेलाई ७-३ ले पराजित गरेको खेलमा १६ वर्षीय ओडेगार्डले क्रिस्टियानो रोनाल्डोको स्थान लिएका थिए । आधा घण्टा मैदान बिताएका ओडेगार्डले आफ्नो प्रतिभा प्रस्तुत गररेका थिए । उक्त खेलमा १९ मध्य १८ पास पूरा गरेका ओडेगार्डले मात्र ३ पटक बल गुमाएका थिए । तीनै टिनएज ओडेगार्ड अहिले कुशल खेलाडी बनेर रियल फर्किएका छन् ।
ओडेगार्ड सन् २०१७ मा लोनमा डच टोली हिरेनभिनमा पुगेका थिए । त्यहाँ उनले ३८ खेल खेल्दै ३ गोल गरे । त्यसपछि अर्को सिजन त्यसै लिगको भिटेसमा उनले थप सुधारिएको प्रदर्शन गरे । ३१ खेल खेल्दै उनले ८ गोल गरे । उनको प्रदर्शनले ला लिगाकै थुप्रै क्लबले उनलाई अनुबन्ध गर्न चाह्यो । म्याड्रिडले २ वर्षका लागि सोसीडाडमा ओडेगार्डलाई तयार गर्न पठाएपनि रियलको आवश्यकता अनुसार उनी १ वर्षमै सिनियर टोलीका लायक बनेका छन् ।

Source link

Share:

Leave a Reply

Your email address will not be published. Required fields are marked *