मेस्सी बिदाको दिन पनि अभ्यासमा

एजेन्सी – प्रि सिजनका लागि यसै साता प्रशिक्षणमा फर्केका बार्सिलोनाका सुपर स्टार लिओनल मेस्सीले लगातार अभ्यासमा पसिना बगाइरहेका छन् । बिहीबार टोलीका अन्य खेलाडीले छुट्टी मनाएपनि मेस्सी भने प्रशिक्षणमा व्यस्त रहे ।

अर्जेन्टिनी फरवार्ड अन्य खेलाडी भन्दा एक साता पछि मात्र प्रशिक्षणमा आबद्ध भएका थिए । च्याम्पियन्स लिगको क्वार्टरफाइनलमा बायर्न म्युनिखसँग ८–२ ले पराजित भएको केहि दिनपछि मेस्सीले बार्सिलोना छाड्ने निर्णय गरेका थिए । तर क्लबले ७ सय मिलियन युरो रिलिज क्लज तिरेको खण्डमा मात्र जान दिने उल्लेख गरेको थियो ।
क्लबसँग विवादमा जानु भन्दा अर्को एक सिजन क्लबमा बस्ने निर्णय गरेपछि मेस्सी र बार्सिलोनाबीचको विवाद सकिएको थियो । त्यसपछि सोमबारबाट मेस्सी अभ्यासमा सामेल भएका थिए । पिसिआर टेष्टको रिपोर्ट नआउँदा सम्म सुरुको दुई दिन पनि मेस्सीले एक्लै अभ्यास गरेका थिए ।
बुधबार भने उनले टोलीका साथ अभ्यास गरेका थिए । बिहीबार बार्सिलोनाले लगातार प्रशिक्षण गरिरहेका सबै खेलाडीलाई बिदा दिएको थियो । प्रशिक्षक कोम्यानले मेस्सीलाई छुट्टि दिएपनि उनले बिहीबार प्रशिक्षणमा सामेल भए । अन्तर्राष्ट्रिय खेलबाट फर्केका फरवार्ड एन्टोइन ग्रिजमन, सर्जियो बुस्केट्स र क्लेमेन्ट लेंगलेट पनि हल्का प्रशिक्षण गरेका थिए ।
नयाँ सिजनका लागि फिट हुनका लागि ध्यानमा राख्दै मेस्सीले एक्लै पनि अभ्यास गरिरहेका छन् । बार्सिलोनाका खेलाडीले शुक्रबार पुनः पूर्ण अभ्यास गर्नेछन् । बार्सिलोनाले शनिबार जिम्याष्टिक डी टारोगोनासँग मैत्रीपूर्ण खेले खेल्नेछ । मेस्सी त्यो मैत्रीपूर्ण खेलमा उत्रने सम्भावना छ ।

Source link

Share:

Leave a Reply

Your email address will not be published. Required fields are marked *