सन्तोष र नवयुगको गोलमा पहिलो हाफमा आर्मीको अग्रता

काठमाडौं (हाम्रो खेलकुद) – विभागीय त्रिभुवन आर्मी फुटबल क्लबले एएफसी कपको दक्षिण एसियाली छनोट अन्तर्गत प्लेअफ चरणको पहिलो खेलमा श्रीलका पुलिस स्पोर्ट्सक्लबविरुद्ध पहिलो हाफमा २–१ को अग्रता लिएको छ ।

त्रिपुरेश्वरस्थित दशरथ रंगशालामा बुधबार भएको खेलमा आर्मीले १–० ले पछि परेको अवस्थामा दुई मिनेटको अन्तरमा दुई गोल गर्दै आर्मीलाई पहिलो हाफमा २–१ को अग्रता दिलाएका हुन् । खेलको पहिलो मिनेटमा नवयुग श्रेष्ठको प्रहार पोस्ट नजिकैबाट बाहिरियो । चौथो मिनेटमा विवेक बस्नेत र कप्तान भरत खवासको वान टु वान पासमा विवेकको प्रहारलाई गोलरक्षक दिनेश महेन्द्रनले बचाए ।
लगत्तै टेक बहादुर बुढाथोकीको क्रसलाई भरत खवास र नवयुग श्रेष्ठले भेट्न नसक्दा आर्मी अग्रता लिनबाट चुक्यो । १०औं मिनेटमा सन्तोष तामाङको झन्डै ३० यार्ड टाढाको प्रहारलाई श्रीलंकाका गोलरक्षक दिनेश महेन्द्रनले पञ्च गर्दै बचाए । १२औं मिनेटमा कप्तान भरत खवासले गोलरक्षक दिनेशलाई बिट गर्दै गरेको प्रहारलाई गोललाइन नजिकैबाट निकोलसले क्लियर गर्दा आर्मी अग्रता लिनबाट चुक्यो ।

लगत्तै सन्तोष तामाङको कर्नरमा भरत खवासको हेडरलाई डिफेन्डरले क्लियर गर्दै बचाए । २१औं मिनेटमा इभान्स एसान्तेको प्रहारलाई आर्मीका गोलरक्षक दिवश चौधरीले बचाए । २८औं मिनेटमा इभान्स एसान्तेले गोल गर्दै श्रीलंका पुलिस स्पोर्ट्स क्लबलाई १–० को अग्रता दिलाए । उनले इसाक एडेभुको पासलाई सदुपयोग गर्दै सहज फिनिस गरेका थिए ।
३४औं मिनेटमा नवयुग श्रेष्ठको क्रस पासमा भरत अवासले पेनाल्टी बक्स भित्र पाएको सुवर्ण अवसरलाई सदुपयोग गर्न नसक्दा आर्मी बराबरीबाट चुक्यो । ३९औं मिनेटमा टंक बहादुर बस्नेतको क्रसमा भरत खवासको फ्रि हेडरले पोस्टको दिशा लिन सकेन ।
४१औं मिनेटमा विकास खवासको थ्रु बललाई विपक्षी खेलाडीले क्लियर गरेको बललाई सन्तोष तामाङले पेनाल्टी बक्सबाहिरबाट हाफ भलीमार्फत दर्शनीय गोल गर्दै आर्मीलाई १–१ गोलको बराबरीमा ल्याए । ४३औं मिनेटमा कप्तान भरत खवासको क्रसमा नवयुग श्रेष्ठले हेडरमार्फत गोल गर्दै आर्मीलाई २–१ को अग्रता दिलाए ।

Source link

Share:

Leave a Reply

Your email address will not be published. Required fields are marked *