लगातार तेस्रो जितसहित आर्मी शीर्षस्थानमा

काठमाडौं (हाम्रो खेलकुद) – विभागीय त्रिभुवन आर्मी क्लब लगातार तेस्रो जित दर्ता गर्दै राजधानीमा जारी पाँचौ संस्करणको आरबीबी एनभिए कप राष्ट्रिय महिला तथा पुरुष क्लब लिग भलिबल च्याम्पियनसिपको महिलातर्फ शीर्षस्थानमा उक्लिएको छ ।

त्रिपुरेश्वरस्थित राष्ट्रिय खेलकुद परिषद (राखेप) को कभर्डहलमा आइतबार भएको खेलमा आर्मीले भरतपुर महानगर खेलकुद परिषदलाई ३–० को सोझो सेटमा पराजित गर्दै शीर्षस्थानमा उक्लन सफल भएको हो । एकपक्षीय खेलमा आर्मीले भरतपुरमाथि २५–९, २५–८ र २५–१३ को सहज जित निकाल्यो ।
आर्मीले पहिलो खेलमा होङ्गान्जी न्यु डायमन्ड स्पोर्ट्स क्लबलाई ३–२ को सेटमा तथा दोस्रो खेलमा ढोरपाटनलाई ३–० को सोझो सेटमा पराजित गरेको थियो । यो जितपछि शीर्षस्थान रहेको आर्मीको तीन खेलबाट ८ अंक पुगेको छ । तीन खेलमा तीन जितसहित समान ८ अंक भएपनि पुलिस सेट प्वाइन्टको आधारमा दोस्रो स्थानमा रहेको छ ।

आइतबारै भएको खेलमा पुलिसले ढोरपाटन स्पोर्ट्स क्लबलाई २५–५, २५–९ र २५–५ को सोझो सेटमा पराजित गर्दै लगातार तेस्रो जित निकालेको छ । पुलिसले पहिलो खेलमा भरतपुरलाई ३–० को सोझो सेटमा तथा दोस्रो खेलमा नेपाल एपिएफ क्लबमाथि ३–२ को जित निकालेको थियो । ढोरपाटनले ४ खेल र भरतपुरले ३ खेल खेल्दा अंकको खाता खोल्न सकेको छैन ।

Source link

Share:

Leave a Reply

Your email address will not be published. Required fields are marked *