बुलबुलेसँग पुलिस पनि पराजित

काठमाडौं (हाम्रो खेलकुद) – बुलबुले रारा भलिबल क्लबले पाँचौं आरबीबी एनभिए कप राष्ट्रिय पुरुष क्लब लिग भलिबल च्याम्पियनसिपमा लगातार दोस्रो जित हासिल गरेको छ ।

अघिल्लो दिन त्रिभुवन आर्मी क्लबलाई स्तब्ध पारेको बुलबुलेले शनिबार अर्को विभागिय टोली नेपाल पुलिस क्लबलाई ३–० को सोझो सेटमा हराएको थियो । च्याम्पियनसिपको तेस्रो दिनको अन्तिम खेलमा तीन पाकिस्तानी खेलाडी उतारिरहेको बुलबुलेले पुलिसलाई २५–२२,२५–१९ र २६–२४ ले पराजित गरेको थियो । ३ खेलमा बुलबुलेको ६ अंक पुगेको छ ।
त्यसअघि शनिबारका अन्य खेलमा टिप टप हेल्प नेपाल स्पोर्टस् क्लब र नेपाल एपिएफ क्लब विजयी भएका थिए । हेल्प नेपालले मणिमुकन्द भलिबल क्लबलाई २५–१५,२५–१६ र २९–२७ ले हराएको थियो । दोस्रो जितसँगै हेल्प नेपालको २ खेलबाट ६ अंक पुगेको छ । मणि मुकुन्दले तीन खेल्दा अंकको खाता खोल्न सकेको छैन ।
अर्को खेलमा एपिएफ क्लबले नयाँ बजार सामाजिक युवा क्लबलाई २५–१२, २५–१६ र २५–१६ ले पराजित गरेको थियो । लगातार तेस्रो जितसँगै एपिएफको ३ खेलबाट ९ अंक पुगेको छ । पराजित नयाँ बजारले तीन खेल खेल्दा अंकको खाता खोल्न सकेको छैन । त्यसअघि महिलातर्फका ३ खेल भएका थिए । शनिबार भएको खेलमा आर्मी र ढोरपाटनले सहज जित निकालेका थिए । अर्को ५ सेट सम्म चलेको खेलमा पुलिसले एपिएफलाई हराएको थियो ।

Source link

Share:

Leave a Reply

Your email address will not be published. Required fields are marked *