रुपको ५ गोलमा स्टार सिटीको फराकिलो जित

नेपालगन्ज (हाम्रो खेलकुद) – रुप बहादुर लामाको ह्याट्रिकसहित ५ गोल मद्दतमा स्टार सिटी युवा क्लब कैलालीले एन्फा प्रेसिडेन्ट लिगमा अपराजित यात्रालाई निरन्तरता दिदा बिहिबार कर्णाली प्रदेशको लेकाली युवा क्लबमाथि ७–१ को फराकिलो जित निकालेको छ ।

नेपालगन्ज रंगशालामा भएको एकपक्षीय खेलमा टोप बहादुर विष्ट र ऋतिक खड्काले गोल थप्दा लेकालीका रोशन रानामगरले एक गोल फर्काए । खेलको नवौं मिनेटमा रोशन रानामगरको गोलबाट लेकालीले अग्रता लिएको थियो । तर लेकालीले त्यो अग्रतालाई जोगाउन सकेन । ३६औं मिनेटमा रुप बहादुर लामाले गोल गर्दै खेललाई १–१ गोलको बराबरीमा ल्याए ।
५५औं मिनेटमा रुपले व्यक्तिगत दोस्रो गोल गर्दै स्टार सिटीलाई २–१ ले अघि बढाए । ६५औं मिनेटमा रुपले ह्याट्रिक पुरा गर्दा स्टार सिटी खेलमा ३–१ ले अघि बढ्यो । ६६औं मिनेटमा टोप बहादुर विष्टले गोल गर्दै स्टार सिटीलाई फराकिलो जिततर्फ अघि बढाए । त्यसपछि रुपले ८२औं र ८६औं मिनेटमा गोल गर्दा स्टार सिटीले ६–१ को आरामदायी अग्रता बनायो ।

इन्ज्युरी समयको थप गरिएको पहिलो मिनेटमा ऋतिक खड्काले गोल गर्दै स्टार सिटीलाई ७–१ को फराकिलो जित दिलाए । पाँच गोल गरेका रुप बहादुर लामा खेलको म्यान अफ दि म्याच घोषित भए ।
जितसँगैं अपराजित रहेको स्टार सिटी १३ अंकसहित लिगको शीर्षस्थानमा रहेको छ । स्टारले ५ खेलमा ४ मा जित र १ खेल बराबरी खेलेको छ । तालिकाको पुछारमा रहेको लेकालीको ५ खेलबाट ४ हार र १ बराबरीका साथ १ अंक छ ।
१५ चैतसम्म चल्ने प्रतियोगितामा सात प्रदेशका ७ च्याम्पियनको सहभागिता रहेको छ । प्रतियोगिताको विजेताले १० लाख रुपैयाँ र उपविजेता टोलीले ५ लाख रुपैयाँ पाउनेछन् । प्रतियोगिताको शिर्ष चार टोलीले राष्ट्रिय लिगमा स्थान बनाउनेछन् ।

Source link

Share:

Leave a Reply

Your email address will not be published. Required fields are marked *