क्रिकेटर जितेन्द्र अब सेकेन्ड लेफ्टिनेन्ट

काठमाडौं (हाम्रो खेलकुद) – नेपाली क्रिकेटका युवा ब्याट्सम्यान जितेन्द्रसिंह ठकुरीले नेपाली सेनाको सहायक सेनानी (सेकेन्ड लेफ्टिनेन्ट) मा नाम निकालेका छन् । सोमबार प्रकाशित नतिजामा परिक्षाको सबै प्रक्रिया पूरा गरेका जितेन्द्रको नाम रहेको छ ।

जितेन्द्रले हाम्रो खेलकुदसँग कुराकानी गर्दै सोमबार साँझ नाम निस्किएको पुष्टि गरे । गत वर्ष चैतमा प्रक्रिया सुरु गरेपनि कोरोना महामारीको कारण अहिले नतिजा आएको जितेन्द्रले जानकारी दिए ।
नेपालको यू-१९ टोलीबाट खेलेका ओपनर जितेन्द्रले दोस्रो संस्करणको प्रधानमन्त्री कप २०१८ मा तत्कालिन बागमती प्रदेशको कप्तानी गरेका थिए । पुर्ख्यौली घर सुर्खेत भएका जितेन्द्र सानैदेखि काठमाडौंबाट क्रिकेट खेल्दै आएका थिए । सन् २०१७ मा उनले नेपालबाट यू१९ एसिया कप खेलेका थिए ।

एसिया कपमा नेपालले भारतलाई १९ रनले हराउँदै ऐतिहासिक जित निकाल्दा जितेन्द्रले ओपनिङ गर्दै ३६ रनको महत्वपूर्ण योगदान दिएका थिए । जितेन्द्रले पछिल्लो समय गतवर्ष सुनसरीको इनरुवामा सम्पन्न मनमोहन मेमोरियल एकदिवसिय क्रिकेट प्रतियोगिता बागमती प्रदेशबाट खेलेका थिए । गत माघमा सम्पन्न प्रधानमन्त्री कपपछि उनले यसैमा बढी केन्द्रित भएको हुँदा नखेलेको बताउँछन् ।
जितेन्द्रले पहिलो संस्करणको पोखरा प्रिमियर लिग (पिपिएल) विराटनगर टाइटन्सबाट खेलेका थिए । धनगढी प्रिमियर लिगको सुरुवाती दुई संस्करण काठमाडौं गोल्डेन्सबाट खेलेका थिए । तेस्रो संस्करणको डिपिएल सिवाईसी अत्तरियाबाट खेल्दै च्याम्पियन बनेका थिए । ओपनिङ ब्याटिङ गर्ने जितेन्द्रले स्पिन बलिङ पनि गर्ने गर्दछन् ।

‘परिक्षाको सम्पूर्ण प्रक्रिया सकिएको छ । आज नाम निस्केको हो । १६ गते पहिलो रिपोर्टिङ छ अनि त्यसपछि तालिममा कहिले जाने थाहा हुन्छ’, जितेन्द्रले भने । जितेन्द्रले अब सैनिक प्रशिक्षण अवधिभर भने क्रिकेटलाई धेरै मिस गर्ने बताए । यद्यपि आर्मीबाटै क्रिकेट खेल्ने अवसर पाउने सम्भावना रहेकाले त्यसमा खुसी रहेको उनले बताए ।

Source link

Share:

Leave a Reply

Your email address will not be published. Required fields are marked *